政壇：林鄭急推香港正能量

聽聞政務司司長林鄭月娥正領軍推動四大香港主題，冀能凝聚全城力量發放正面訊息。據聞呢個大型運動最快喺四月底預算案獲立法會通過後面世，歷時至少半年，政府為隆重其事會為此創作標誌，稍後更會推出主題曲添！

有知情人士透露，林鄭最近接連邀請跨界別人士舉行午餐會，期間透露政府有意同社會各界團體合作，喺年中開始推動四大主題，包括「活力香港」、「潮流香港」、「關愛香港」同「清新香港」，據悉幾乎政府各個部門都會參與其中，當中以民政事務局嘅角色最為吃重，至少有兩個半主題同佢哋有關，另外教育局、環境局等亦要幫手。

以「清新香港」主題為例，消息指涉及範圍特別廣闊，包括環保、衞生同減少廚餘等，有致力促進減少廚餘產生嘅團體開始做前期準備工作，據聞正同大型發展商商討喺佢哋旗下嘅商場，做好啲廚餘回收工作，包括游說佢哋設立廚餘機。至於「活力香港」主題，據聞有業界正計劃搞兩岸四地比賽切磋交流，並擬邀請內地同外國金牌運動員來港助陣，希望能為青少年注入正能量。

雖然四大主題當前，但消息指政府資源有限，主要靠民間自發舉行活動，之後當局會有系統整理活動，並上載至專門網頁介紹，遲啲仲會有個啟動儀式添！