賣產救亡終告吹 淫媒死剩一張嘴

「奈何我的愚昧，換來好夢難圓」，對呢兩句歌詞，相信淫賤黎一定好有感觸。呢，壹淫媒出售台灣業務救亡大計，前後擾攘超過一年，最終以爛尾收場，淫賤黎以愚昧換來好夢難圓，都咪話唔傷心。

講起都好笑，當初台灣商人提出超高價收購，氹到淫賤黎鬼咁開心，以為真係有咁大隻蛤乸隨街跳，點知臨到交易期屆滿前，買家先至打退堂鼓，搞到淫賤黎一場歡喜一場空，都唔知係咪畀人整蠱。其實又唔怪得台灣商人嘅，在商言商吖嘛，壹淫媒誨淫誨盜，臭名遠播，加上電視及免費報瘋狂燒錢咯喎，人哋肯買呢隻爛蘋果至奇吖。

淫賤黎仲喺度死撐，聲稱「今次賣唔去，以後永遠都唔會再賣，因為咁樣對員工唔公道，對讀者唔公道」喎。嗱，呢啲咪叫跌落地揦番拃沙囉，依家係人哋唔肯買，唔係你唔肯賣吖，九唔搭八！

大家試諗下，淫賤黎賣產爛尾會有乜嘢後果？係人都知，壹淫媒電視業務及免費報流血不止，要靠舉債度日，目前欠銀行貸款已高達十二億元。淨係舊年十一月公布嘅中期業績咋，壹淫媒就錄得逾九億元虧損，其中電視及多媒體業務蝕近十億元，互聯網蝕六千幾萬元，估計全年度虧損可能高達十五億元添。試問壹淫媒仲有幾多錢蝕呢？仲可以蝕幾多年呢？正如有人話齋，壹淫媒唔賣產，結果只有兩個可能，一係蝕光為止，被迫破產，二係宣告執笠，自動消失。

再講喇，淫賤黎一向言而無信，今日話永遠唔再賣產啫，聽日隨時自打嘴巴o架。就好似當年出售佐丹奴股權咁，佢呢頭承諾半年內唔再減持，點知未夠四個月就全部賣晒；而最鬼祟嘅係，佢上午仲實牙實齒聲稱並冇要求證券公司出售股份，亦冇確實配股計劃，但當晚就完成配股，擺明誤導投資者啫。所以話，「一日一爛果，真相遠離我」，淫賤黎靠得住，豬乸會上樹。係呢，當時證監會咪話會調查嘅，點解最後不了了之？點解又放生淫賤黎？

講到放生淫賤黎，其實都見怪不怪嘅喇。台灣嗰邊係官商聯手抵制壹淫媒，唔畀爛蘋果侵蝕社會，而香港呢邊就官商合作包庇壹淫媒，搞到成個社會烏煙瘴氣。尤其內地官僚更加係敵友不分，是非不辨，一時提供貸款助壹淫媒上市，一時畀爛蘋果喺深圳賣通街，一時為淫賤黎出自傳，一時邀請壹淫媒記者北上採訪，反中亂港有運行，唔怪得淫賤黎愈淫賤愈快樂喇。北大人仲話乜嘢三個堅定不移，要確保愛港愛國力量長期執政喎，簡直係癡人說夢，叮！