SUN搞作：打橫嚟講：沉默做貢獻的實事

富商說「愛國」三原則，乃「講真話、做實事、有貢獻」。嘩吓！佢嘅觀點，竟同本欄早前所講的，如出一轍，哈哈！唔通係本欄嘅忠實讀者乎？

嗱！唔係話偷橋，小弟亦無意叨光，也不是甚麼「英雄所見略同」，而係那三大原則，只是十分顯淺的基本行為，講真，唔使浮誇話到「愛唔愛國」咁偉大層面啦！做個小公民，甚或小職員，平日做人做事，都應「講真話、做實事、有貢獻」o架啦！唔通係要出戰香港特區普選特首先至似番一個人咩？

繼大陸小官不理香港人意願，硬Sell虛無的「愛國論」後，本地一批土共亦跟尾學舌，更誇大阿爺旨意，假傳聖令，話「對抗中央的人，不能擔任特首」。

咁點做才不算「唔係對抗中央」呢？例如，國家領導人要香港特區推翻以往行之有效的法制，落實佢倡議的「三權合作」（即行政、立法、司法不再互相制衡的作獨立判斷），唔聽佢講，就係「對抗」？

又例如，一個民主國家係應有不同的黨派或代表，以公平公正公開的機制，讓人民選賢能，交替管治社會的，咁要求「結束一黨專政」，會否判為「叛國」o架？比唔聽話的「對抗中央」更大鑊喎！

反正《基本法》內，都無明文規定有「愛國愛港」的條文，何解唔跟《基本法》的法例行事，有法可依，總比「人治」的好呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府