政壇：政商定格：黃進達婚照謝絕露兩點

說說康泰旅行社董事總經理Jason黃進達舊年被細佬爬頭做「老襯」，今年九月終於到佢同拍拖八年嘅女友拉埋天窗。Jason自從被父親黃士心大爆婚訊後，好多人都關心婚事籌備成點，本身做旅遊，去邊度影相同度蜜月都好有參考價值喎。

佢尋日就自爆話下月會一口氣飛去外地影兩輯婚紗相，首站去首爾，係未來老婆揀嘅，老婆仔話明要有浪漫韓國Style，即係影出嚟嘅效果好似公主王子嗰啲。講到唔少人會着番套好似《大長今》嗰啲傳統韓服影婚照，仲有韓國型男必備「大眼裝」畫眼線，佢即刻耍手兼擰頭話「咪搞」，今次只會正正經經着禮服影，仲叫記者唔好同佢老婆講有畫眼線呢回事。

第二站係布吉，佢話未諗到用乜嘢造型，記者就提議佢一係着泳褲，學猛男Show咁戴埋煲呔，一係着夏威夷恤、踢拖，點知佢話謝絕「露兩點」。