政壇：搞搞政：長毛高薪霸公屋唔合理

立法會尋日有議員提質詢，話領匯不斷加租，加重市民生活負擔，要求政府回購領匯，點知社民連主席「長毛」梁國雄就將呢個議題連帶去話自己住公屋，所以了解公屋居民嘅苦況，又質疑運輸及房屋局局長張炳良唔係住公屋，所以唔熟喎。年薪逾一百萬元嘅長毛咁公開話畀局長聽自己住緊公屋，唔怕房屋署收樓咩？

其實，本報早前已報道過長毛住公屋嘅事，佢當時堅稱話咁多年嚟一直交雙倍租，仲話成副身家只得九萬元，所以佢是對是錯則需由公眾判斷。不過，張炳良尋日對於長毛呢個講法，就即時回應話，自己雖然唔係住公屋，但都知道地區嘅情況，而且新公屋屋邨已經冇交畀領匯管理，相信房委會會改善有關問題。

既然咁關心公屋居民嘅生活負擔，點解月薪七、八萬元嘅長毛仍然唔搬走呢？如果涉及霸佔公屋，阻礙基層人士上樓嘅話，點講都唔啱，倘若硬要將霸佔公屋合理化，就更加唔啱。