政壇：立會訪韓鴨仔團夠墟冚

話說立法會議員下個月初會同環境局官員去南韓首爾，考察當地嘅減廢經驗，呢個鴨仔團大大話話有十八人，三、兩個人行開行埋唔知去咗邊都好麻煩。身兼呢個立法會考察團團長嘅環境事務委員會主席Cyd何秀蘭就話佢一個人照顧唔到咁多個，已託秘書處幫手走失時搵鴨仔都易啲喎。

呢個南韓鴨仔團仲有約一個星期就出發，有人就對喺當地嘅膳食安排要求多多。阿Cyd呢排就忙於籌備，由考察時會議嘅發言時間、到食飯安排都要諗過度過。講到餐單安排，佢就連聲話煩︰「當地啲餐廳通常細細間，加上時間又緊迫，坐低先諗嘅話，煮得嚟都夠鐘上車。」於是佢已決定會早一、兩日叫議員睇定餐牌同揀咗先，等餐廳可預先準備。

阿Cyd又話唔知係咪因佢哋人多勢眾，環境局連同局長黃錦星、副局長陸恭蕙、政治助理區詠芷等足足派咗十六人，直情係人盯人咁。三十幾人外訪所費不菲，希望唔好浪費公帑啦。