政壇：陳晴三代都玩角色扮演

依家時下年輕一輩，人人都「機不離手」玩遊戲，而聯合國兒童基金會（UNICEF）提倡「遊戲」應包含四大真粹，包括孩子主導、快樂成長、隨時隨地同自由空間。「牛下女車神」李慧詩尋日獲UNICEF委任為香港委員會大使，尋日出席兒童遊戲權利活動時，自稱「細個一有時間就玩」嘅佢絕對明白遊戲嘅真正意義，皆因屋邨長大嘅佢自細就同一班鄰居四圍玩水槍、掟手巾同大風吹遊戲，由於物質享受唔多，佢更同鄰居自創「大白鯊」遊戲（其實係「捉依因」變奏版）。

UNICEF香港委員會主席Judy陳晴亦話寧可將童年玩意傳授畀囝囝，謝絕智能手機！佢透露細個時最鍾意同父母玩角色扮演遊戲，父親港澳辦前主任陳佐洱更會扮演囝囝，反問Judy「點樣做好人」啟發思考，相當有教育意義。依家囝囝亦喺佢薰陶下愛上角色扮演，教Judy執玩具添！

身兼副主席嘅前廣告界女強人紀文鳳就遺憾細個因為父母管教嚴，惟有專注讀書，八兄弟姊妹都冇乜機會落街玩，但亦造就佢呢副自言「死做爛做」都唔見攰嘅堅強個性。