政壇:建制派幫拖 劉江華過骨

全國人大常委會法律委員會主任委員喬曉陽同中聯辦主任張曉明日前異口同聲要求建制派議員團結一致,全力支持特區政府依法施政。唔知係咪受到喬老爺感召,白鴿黨涂謹申尋日再次喺立法會追問署理政制及內地事務局局長劉江華有關愛國愛港嘅定義時,六個建制派議員即時跳出嚟「幫拖」喎!

繼黨主席劉慧卿後,阿涂尋日再次就「愛國愛港」提出質詢,話既然喬曉陽表明同中央對抗嘅人唔可以擔任特首,係咪等同中央選特首,而唔係香港人選特首。劉江華上星期已畀人話係人肉錄音機,點知佢今個星期更加變本加厲,以極度緩慢嘅速度播足三分鐘帶,話政府仍未就一七年特首選舉安排細節提出既定方案,當局會細心聆聽社會各界意見,會喺適當時候展開諮詢。

齊心用盡發問時間

為阻止泛民針對劉江華,建仔四個成員攜手鬥快撳掣,何俊賢質疑坊間話選舉有篩選其實係偷換概念,問國籍限制算唔算篩選;蔣麗芸同黃定光問提名委員會嘅組成會唔會包括全體立法會議員,梁志祥就關注如果對抗中央嘅人成為候選人係咪違憲。除咗自己人幫手幫到出晒面,但身兼行會成員嘅林健鋒同富貴黨鍾國斌都有撳掣問問題霸住啲時間,當中林健鋒仲問劉江華點樣確保政改五部曲唔會偏離《基本法》,令劉江華可以好似背書咁讀多次五部曲出嚟。好明顯係一齊拖,拖到用盡發問嘅時間,合演「真」團結。

人民力量黃毓民同工黨李卓人就鬧爆劉江華不斷講廢話嘥時間,仲寸佢唔係人肉錄音機而係廢話播放機,又質疑當局係存心拖延諮詢等喬老爺出手。不過無論大家點問點鬧,劉江華都用「社會有唔同意見」呢句嚟做擋箭牌,叫各黨派平心靜氣處理普選議題,激死一班不斷追問嘅泛民議員。

第一手消息請下載on.cc東方互動iPhone/iPad/Android/Windows Phone Apps

設計圖片