俠義明哥：我冇怪佢哋

【記者張恬怡報道】「我都冇怪佢哋，公眾唔好再責怪落去，亦都唔好再窮追猛打……」即使被大學生「揼心口」，明哥昨仍處處維護這班大學生，為他們說盡好話，盡顯容人之量。明哥坦言，贊助學生對他無大壓力：「又唔影響我幫助其他有需要嘅人，希望佢哋到有能力時可以關心下低下階層，為社會服務就可以喇。」他衷心希望今次事件可「大事化小，將負面變正面」，更不忘提議學生參加他助人之舉，正正是他店內牌匾所寫「俠義心腸、大愛無限」的最佳寫照。

今次事件引發社會極大回響，涉事浸大生更被網民狂插，明哥直言是始料不及，但他多次強調只屬小事一宗，自己從沒怪責學生，他昨日更盡顯維護之情。記者多番問他是哪個學系學生要他贊助，他刻意吩咐「唔使寫邊個學系啦」，希望大家「多啲原諒，唔好帶咁多仇恨」。

過去亦曾有其他大專院校尋求贊助，但明哥昨語重心長指，「言者無罪，聞者足戒」，日後自己亦會向尋求贊助的學生解釋資源需用來協助更有需要的人，但如對方經濟有問題，亦必定會幫。

衣着樸素的明哥，一直堅持以最低廉價格為街坊提供飯餐，現時一個燒味雙拼仍只售二十餘元，他多年來每逢周六都派發八十個飯盒給有需要人士，逢大時大節派發的飯盒更達數百個，他甚至親身拿去給露宿者。其善行一傳十、十傳百，曾上門拍攝特輯的藝人戚美珍和洪金寶亦知悉，洪金寶之後更出錢給他行善。