保險爭拗多多 皆因監管甩漏

電視宣傳廣告有云，「保險傍身，出門放心。」消費者花錢買保險，無非想買個保障，求個安心嘅啫，可惜喺現實之中，半斤未必等於八両，買咗保險唔表示一定可以得到保障吖。

唔係太一叮亂噏o架，保險索償投訴局去年接獲近四百八十宗投訴，比前年激增一成八，投訴五花八門，主要涉及住院及醫療保險、旅遊及危疾保險。點解會有咁多投訴？事關保險公司往往咬文嚼字，玩弄文字遊戲，唔少保單條款暗藏玄機，甚至暗藏陷阱，消費者稍為睇漏眼咋，隨時買咗保險都冇得賠。

呢嗱，有位長者購買人壽保險三年後因膀胱癌逝世，其妻向保險公司申索死亡賠償，點知保險公司指受保人購買保單前六個月已有尿頻及尿急嘅徵狀，而冇向保險公司作出申報，所以冇得賠喎，你話係咪無奈吖。另外有宗投訴個案係咁嘅，病人因聲帶生瘜肉入院進行切除手術，保險公司居然話瘜肉係良性腫瘤，拒絕賠償。叮，保險公司大玩語言偽術，乜都係佢哋講晒，消費者勢單力薄，又點夠人哋拗吖！

醫療保險爭拗多多，旅遊保險亦唔好得去邊嘅咋。早前港人遊埃及發生熱氣球致命慘劇，九名罹難者事前全部買咗旅遊保險，但結果就唔係個個都有得賠。保險公司理直氣壯咁話，保單條款寫明保障範圍唔包括空中活動喎。所以話，同人唔同命，同遮唔同柄，原來買保險都要睇運氣，事關分分鐘有唔同結果o架，消費者只能望天打卦。唔怪得有人話，買保險根本唔係保障消費者，而係保障保險公司。

話時話，家陣推銷保險嘅渠道愈來愈多，連銀行都賣埋保險，仲周不時有陌生人打電話嚟推銷添，花多眼亂之下，好多消費者連自己買咗乜嘢保單都矇查查。試過有位六十幾歲婆婆被人游說購買投資壽險，等到供款期滿想攞番本利，至發現合約寫明二十年後即八十幾歲先至可以攞錢，睇嚟真係要同保險公司鬥長命至得。

講到底，保險陷阱多多，爭拗不絕，主要原因係條文不清晰，當局監管不足。最離譜嘅係，港府為咗推卸公共醫療責任，仲話稍後會再次推出自願醫保建議，希望盡快成事喎。計太一叮話齋，保險投訴年年增加，當局唔諗辦法加強監管，堵塞漏洞，反而一意孤行搞自願醫保，簡直係本末倒置，九唔搭八。強積金已經被指係騙局，打工仔任人宰割，如果再推出自願醫保，即係騙上加騙，劏完又劏o架咋，叮！