SUN世代：假髮情真

三千髮絲，除了長短曲直紮髮髻外，在假髮造型師Annie Woon手上，還可成為時尚潮流，甚至化成一件件藝術作品。十多年一路走來，假髮為她贏了名聲，更讓她開了首個個人假髮展覽，她卻深信這條假髮路，還能走得更遠，「假髮除咗可以令人變靚，仲可以令因患病而脫髮嘅人，重拾自信，假髮普及化，就可以令更多人受惠。」

「好多人對假髮嘅形象，都比較負面，一來覺得用假髮，即係頭髮有問題，而且假髮總令人聯想到恐怖片，哈哈！」一個個造型、顏色各異的假髮，在Annie工作室內整齊「列陣」，甚至化身成白兔、松鼠身上的飾物，對假髮的印象，不得不重新詮釋。

Annie與假髮之間，似是早有牽引。九七年，她正在大學攻讀法律系，專業之路近在咫尺，一趟紐約之旅，卻令她命運從此扭轉，「當時去探朋友，喺百貨公司閒逛，就畀其中一個櫥窗吸引住。」櫥窗內放滿賓尼兔，每隻都穿上不同的潮流服飾，還配襯着手袋和鞋，唯獨頭頂光禿禿，令整體造型若有所失，「真正嘅時裝，唔單止係衫褲鞋襪間嘅配搭，仲要連埋化妝同髮型，先算係total look。」

回港後，她嘗試設計一系列假髮，正式踏上假髮設計之路，「啱啱開始時，只係諗住喺課餘時間當兼職咁做，但唔夠半年，就開始有藝人主動接觸，搵我設計假髮。」工作量驟然增多，令她萌生了全職造假髮的念頭。

憑藉對潮流的敏銳觸覺，加上妙想天開的大膽設計，Annie在行內愈來愈吃得開，成為多個著名藝人的「御用」假髮造型師，參與過多套電影與演唱會的假髮設計。事業如日方中，卻遇上沙士，險些砸掉一切，「當時整個娛樂事業都不景氣，演唱會一係cut budget，一係拖數，經營環境惡劣到要搵份全職工作，補貼番造假髮嘅支出。」

前路看似暗淡，她卻從未想過放棄。○三年，她成為梅艷芳最後演唱會的假髮造型師，「當時梅姐身體已經好差，但每當佢戴住假髮出場，總讓人感覺到佢風采依然，嗰刻我明白到，假髮唔止係時裝，仲可以令病人重拾自信，既然我嘅工作咁有意義，我又點可以輕言放棄？」

Annie的母親其後亦因癌病去世，更令她決心為癌症病人多作點事。現時，她每年都會向香港乳癌基金會，捐出多個假髮，還積極推動假髮在港普及，「喺台灣，好多醫院都有賣假髮嘅舖頭，希望將來香港嘅醫院，能夠提供同樣服務，方便更多有需要嘅人！」

Annie's Profile

現職：假髮造型師、醫療真髮中心策劃人

婚姻狀況：已婚，育有三子