政壇：政商定格：譚耀宗派黨報捱鬧

立法會議員譚耀宗尋日率領多位黨友，喺中環畢打街向市民派發佢哋新一期黨報。話說譚Sir尋日負責嗌咪，可惜佢把聲太過沉悶，聽落似催眠曲多啲，後來換上聲如洪鐘嘅Ann蔣麗芸嗌咪後，嚇到大家當堂醒晒。有阿Ann落力宣傳，譚Sir就安心四出派黨報，點知佢好企唔企，企正喺報紙檔前面，搞到檔主忍唔住開聲鬧佢︰「企過啲派吖嘛，阻住做生意呀！」譚Sir惟有面懵懵行開啲。

經過選舉、見慣街坊嘅阿Ann同EQ葛珮帆就出動笑容攻勢，全程四萬咁口對住趕食晏嘅上班一族，結果就派完一疊又一疊，成績不俗。但最搞笑嘅都係漁農界議員何俊賢，佢本身已「高」人一等，但仲要高舉份黨報，驚死人睇唔到咁，咁舉高手法，唔怪得佢派咗無耐就大呻好攰喇。