政壇：政商定格：高永文天生水果狂

衞生署尋日喺海洋公園舉辦開心果月嘅宣傳活動，搵咗食物及衞生局局長高永文擔任主禮嘉賓，仲即場試食海洋公園最新推出嘅水果盛宴。當大會播放大熊貓平日食乜生果嘅片段時，高局長喺台下雀躍非常，上菜時仲忍唔住用手機影相。

高永文自爆細細個已經好鍾意食水果，每次去旅行都會探索當地嘅特色水果，有時連中文名都唔知就試，曾喺印度試過一款外形似熱情果，但果肉清甜無比嘅水果叫做「Margissa」，到依家都食過翻尋味。但係要佢揀最鍾意嘅水果，始終離不開潮州特產「蕉柑」。

佢笑言囝囝唔似佢咁乜水果都啱，佢話呢個情況同衞生署做嘅調查好似，唔夠兩成港人每日進食足夠分量嘅蔬果，而且被訪者年紀愈細，食唔足生果嘅人愈多。衞生署今年決定將生果日升格做生果月，希望鼓勵更多市民養成每日食水果嘅習慣。