政壇：搞搞政：鐵頭仁涂謹申 候選立會新懶蛇

新一屆立法會開波至今超過半年，據聞有部分議員好關注今年嘅考勤報告，事關過去人所共知嘅「四大懶蛇」新界鄉議局主席劉皇發、前中總代表黃宜弘、前金融界李國寶同體育界霍震霆，每年都輪流被批唔開會，咁被人批評真係瘀到爆。

但立會換屆後，「四大懶蛇」之中除發叔連任外，其餘三個都「被勸退」或棄選，勢必有人「替補」頂上。據聞立會部分議員曾私下討論「新四大懶蛇」嘅可能人選，其中一致認為發叔係「鐵膽」，主因係佢有「懶蛇」往績可尋，另外三個「新懶蛇」係邊個？

喺建制派當中，醫學界「怪醫」梁家騮成大熱，事關佢一向神龍見首不見尾，除業界議題外，都好難估到佢會關心其他乜議題，更枉論佢會否坐定定出席會議投票，所以好多人都估佢係熱門。另一熱門「懶蛇」人選係地產及建造界「大舊石」石禮謙，有分析認為佢過去出席率都係麻麻哋，依家冇咗霍震霆等人墊底，估計佢今次都係難逃入伍喎。

至於「四大懶蛇」末席，議員之間眾說紛紜，有人預言人選來自泛民主派，首推本身係「雙料議員」嘅白鴿黨「鐵頭仁」何俊仁同涂謹申，主因係議會工作重疊搞到顧此失彼，認真信不信由你。