政壇:波波落場怕被「省」

立法會足球隊同政府足球隊每年都會對戰,不成文規定,每年都有問責官員落場做精神領袖,但據聞官場中人今年好頭痛,因為多個「鐵膽」離開官場。聽聞好多人屬意由曾代表立會足球隊出場嘅波牛、依家貴為發展局局長嘅陳茂波(波波)「替補」落場,唯一擔心係忙於搵地會唔會影響波波落場嘅意欲喎!

新一屆立會足球隊自舊年十月重組後氣勢如虹,其中一向有踢開波嘅議員梁志祥,一連兩場都有波入,成為立會足球隊新「靈魂人物」,相反新政府足球隊基本骨幹都欠奉。

最多人推薦

有知情人士指出,自從前政務司司長林瑞麟喺舊年六月底同官場講再見後,政府足球隊剩番嘅「鐵膽」只有民政事務局副秘書長麥敬年等人,其他落場球員就要喺紀律部隊中搵,但據聞搵嚟搵去都爭個問責官員落場。

消息指官場中人環顧新政府問責高官,據聞最多人推薦波波「替補」落場,事關佢做立會議員時都曾披甲上陣,一來對於立會足球隊球員嘅認識,喺知己知彼情況下可以「過料」畀官場中人作針對性部署,另一方面相信立會班舊同僚為免傷及和氣,見到波波落場會就住嚟踢。之不過,亦有人話依家行政、立法關係欠佳,波波之前又曾捲入劏房醜聞,啲議員會唔會係咁用波省佢,都好難講。

聽聞波波依家都係十五十六,究竟佢會否「捱義氣」落場,又或者為咗避波唔落場?大家拭目以待嘞!

第一手消息請下載on.cc東方互動iPhone/iPad/Android/Windows Phone Apps

設計圖片