科研資助缺水 環保產業吹水

大家有無發覺，本港環保產業愈來愈似一盞電力不足嘅電燈膽？一直光下暗下、光下暗下，根本睇唔到前景。

點解環保產業搞來搞去都無法發揚光大呢？呢條問題本來最好問前特首曾蔭權爵士，一來佢曾經醉心於慳電膽益親家遊戲，對環保產業上唔足電應該心知肚明；二來咯喎，係佢將環保產業列入六大優勢產業之後就不聞不問，搞到今日局面實在難辭其咎。不過算啦，貪曾以前唔嗲唔吊，今日仲點會關心業界死活吖。實際啲，喺以下呢位學者身上搵答案啦。

呢位學者叫許樹源，香港大學電機工程系教授，畢生醉心環保科研，啱啱憑住研發出穩定風能同太陽能電力系統嘅「電氣彈簧」技術，成為裘槎基金會優秀科研者獎嘅其中一位得獎者。大家咪以為許樹源研究風能發電，科研工作一定順風順水呀，事實啱啱相反，呢條科研之路相當難行，一切正正皆因「缺水」。

許樹源係咁講嘅，喺本港做環保科研面對最大障礙係資金不足，由於欠缺大型實驗室，根本難以埋首科研工作。許樹源批評港府對環保科研嘅重視同資助遠遠低於其他國家：「歐洲講緊每個實驗室資助過億，但香港少則得幾十萬！」

環保科研之路難以走上光明大道，除咗五行欠水，亦因為學生欠缺理想。許樹源慨嘆本港學生短視，有門生甚至質問佢，與其升讀博士，倒不如炒樓賺快錢。

叮，明晒。環保產業之所以一潭死水，其中一個主要原因就係官老爺鼠目寸光，唔肯投放金錢推動科研，資源緊絀之下搞到業界一個二個變晒電力不足嘅電燈膽。嗱，許樹源算幸運o架喇，一直以嚟唔知有幾多科研項目被扼殺糟蹋！

開講都有話啦，錢唔係萬能，但無錢就萬萬不能。一個產業嘅發展潛力往往同政府嘅財力支援成正比，港府資助科研少人一截，環保產業點會唔變成一潭無源之水吖。事實上，香港對科研嘅資助開支只佔本地生產總值百分之零點零五，莫講唔可以同歐美國家相提並論，就算新加坡同台灣亦遠遠比唔上。咁就想發展環保產業？吹水就得！

仲有呀，前朝政府一味向地產霸權傾斜，搞到地產獨大，百業凋零，人人諗住翹埋雙手炒樓炒舖就可以發達，仲邊有人肯埋頭科研、投資科研吖，嘥氣！

咁啦，許樹源專長於電能轉換技術，如果有一項技術可以將港府由低能轉高能，環保產業就真係一天光晒嘞，叮！