SUN搞作：打橫嚟講： 「一國兩制」下的「愛國愛港」

如果你係一個智商健全嘅老闆，你招聘員工時（即使低級至洗廁所），你會請個有能力的，定係一個庸廢，但好聽你話、毫無主見，甚或假公濟私搵着數嘅大話精、陽奉陰違嘅擦鞋仔呢？

又，如果，你係一個毋須為搵兩餐、養妻活兒（養老公都得）的打工仔，見個老細毫無人性，只為錢財利益，刻薄寡情，仲係廢話連篇、財大氣粗、因自卑而自大的暴發戶，成日鬧人，話人唔夠忠心，唔幫佢maintain佢嘅霸業，咁你會有幾多歸屬感？有幾真心同耐性去滿足呢位無休止欲望的賤精呢？

做嘢，應該係靠「本事」的，有能者居之嘛！全球都係咁o架啦！唯獨在中國境內，多一道屏障，哦！我知係「走後門」，要有「人事」關係！錯！呢啲「平常規矩」，已再唔係甚麼原則了！最新的條件，係要「愛國」呀！

在中國，「愛國」也要分等級的，小孩童的愛國表現，好簡單，看到國旗扯高，內心好激動便掂了！做鄉郊政協，肯捐十萬八萬畀當地政府機關也成！想做香港全民普選出嚟嘅特首？噢！首先唔准對抗中央囉！吓！問「誰」是「中央」？凡有膽量會問「誰是中央」的人，已沒資格入選為「預選名單」內的候選乖乖矣！

首屆香港普選的特首，在「愛國愛港」的大前提下，係不能違抗中央，即係要聽話聽教，唯命是從，以「中國」的利益為優先首要考慮，以執行中國領導人的命令為唯一的決定，否則，如何彰顯「愛國」的表現？「愛國愛港」一詞，跟「一國兩制」一樣，早早說明「國」在前、港在後的了，仲有得拗？認命吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府