SUN搞作：Sun官場現形記：邊得嚟咁多敵人

大番薯︰佢哋班傻仔，咁都信我哋組聯盟。

漢 奸︰此話何解？

大番薯︰我哋白鴿黨不嬲識撈，啲市民要咩，咪畀咩佢，早前猛畀人話唔夠硬淨，今次咪佔領中環囉！

漢 奸︰但咁多人喺度，怕唔怕啲風頭咪會分薄晒？

大番薯︰兄弟，呢啲叫風險管理，如果畀人讚，風頭的確係會出少啲，但同樣道理，如果呢單嘢畀人鬧，都可以分散注意力，唔使畀人集中火力「燒鴿」咪大鑊，上次單嘢仲未受夠教訓咩？

漢 奸︰但咁樣轉軚，又怕唔怕畀人話牆頭草？

大番薯︰你真係太耐無喺呢個圈子撈喇，有云政治一日都嫌多，何況學隔籬個黨嘅幫主話齋，呢啲叫「知來者之可追」，怕咩會畀人話，讚我哋都嚟唔切喇。

漢 奸︰講起隔籬個黨嘅幫主，怕唔怕佢會搞事？

大番薯︰最好搞事添，我哋名正言順踢走佢哋，話佢哋唔合作，到時企喺道德高地嘅，咪又係我哋。

漢 奸︰好似好有道理咁喎！（呢個時候，幫主咁啱行過。）

大番薯︰咦，乜咁啱嘅，希望你前事不計，大家以後合作愉快！

幫 主︰千祈唔好咁講！

大番薯︰你又啱，呢個圈邊有永遠嘅敵人o架，哈！哈！哈！