SUN搞作：大偽術家

唔知大家仲記唔記得，白鴿黨前幾年聲稱為咗香港人而支持政改，仲要懶係走溫和路線。到咗今時今日，白鴿黨又有另一種說法，佢話要爭取普選，就一定要做啲嘢，所以李漢奸、鐵頭仁都話好支持「佔領中環」，仲大大聲咁同大家講，無論有咩後果都無怨無悔喎！

嘩！咁厚面皮嘅說話都講得出口，真係正宗嘅禮義廉！其實明眼人一睇就睇穿白鴿黨嘅把戲喇，佢哋搞呢樣、搞嗰樣，無非都係想抽水、攞着數喇！因為喺上年立法會選舉，白鴿黨輸到眼都凸，原因之一就係走溫和路線，選民唔buy。所以依家有咁好嘅機會，可以抽水翻身，白鴿黨仲唔即刻大義凜然走出嚟扮正義咩！變臉變得咁快，仲叻過啲國術大師，「大偽術家」之名，當之無愧喇！