政壇：政商定格：黃永龍家族男丁必讀哥大

信和置業主席黃志祥二仔、年僅二十五歲嘅David黃永龍，喺美國著名學府哥倫比亞大學歷史系畢業返港半年，日前佢現身北京海外聯誼會青委會春茗時話，家姐近日生咗BB，希望多啲時間坐月湊B，佢於是幫手分擔管理租務生意。

唔少富二代讀大學，鍾意揀會計、法律、經濟或工商管理，事關接掌家族生意方便得多，但David就揀歷史科。

點解？佢謙稱讀書唔叻，所以唔似大哥咁，揀讀經濟學。佢仲透露家族一個秘密，原來爸爸對選校要求高，如果係仔嘅話，全部安排入讀哥倫比亞大學，係女嘅話，就入讀耶魯大學，呢個傳統，一直跟到足喎。