政壇：搞搞政：預算案拉布 五月中死線

財爺鬍鬚曾喺二月底宣布嘅新一份預算案，立法會將於四月二十四日恢復二讀，「長毛」梁國雄表明會「拉布」要求政府全民派錢一萬元同推出全民退休保障，加上其他泛民黨派嘅零星修訂，總共有數百條修訂。「拉布」戰幔即掀起，行政、立法博弈再次展開，而五月中就係拉布嘅死線。

雖然立會早前通過向政府批出嘅七百五十五億元臨時撥款，預計只可用到不足兩個半月，即係去到五月底就用完，加上政府每年只可申請一次臨時撥款，換言之，如「拉布」戰事超過四星期，政府分分鐘會因冇錢而癱瘓，公務員、綜援戶隨時因而冇糧出。據聞政府內部評估形勢後，預料「拉布」可以喺兩至三個星期內結束，但如果未能結束，就要狠狠「剪布」。

要防止政府癱瘓，立會主席曾鈺成扮演重要角色，除可出絕招「剪布」外，亦可決定相關修訂係咪可以提出同點樣提出。過往有議員製造大量修訂，但係其實主席大可以修訂針對同一撥款分目為由，決定合併辯論同表決，大大縮短辯論時間。不過，「你有張良計、我有過牆梯」，長毛就再預告會變陣提出「逐個局長逐個減人工」之類嘅修訂，究竟最後係咪可合併辯論，咁就要睇主席嘅智慧喇！