政壇：李國棟事忙辭任馬會董事

香港賽馬會尋日發新聞稿，宣布加入董事局九年嘅李國棟醫生決定退任董事一職，原因係佢喺本港及海外嘅專業事務同公職日漸繁重。至於佢個大董空缺，有消息話可能會由遴選會員、立法會議員廖長江或中策集團柯清輝接棒。

馬會話李國棟自舊年底開始，先後就任香港醫學專科學院主席、智經研究中心主席、世界家庭醫生組織（WONCA）亞太區主席，以及擔任多個政府同公共衞生組織嘅成員。佢喺○四年擔任馬會大董後，曾加入該會多個常務及專責委員會工作，○八年仲做埋投注委員會主席，公職多到數手指都數唔晒，難怪佢吃不消，要退任抖抖氣喇！

李國棟係香港四大家族之一李佩材嘅第四代後人，早喺一九七八年已成為馬會會員，九五年獲選為遴選會員，○四年二月獲馬會邀請加入董事局，填補當年忽然離世嘅李福深之董事空缺，而李福深就係佢嘅堂叔。