政壇：懲教女槍手挑戰高難度
見到眼大樣靚嘅二級懲教助理李詠儀同班身形魁梧、鬚根密布嘅男子漢，一齊着住軍裝揸槍演練嘅英姿，先知「巾幗不讓鬚眉」真正嘅畫面。最新一期懲教署月刊《愛群》介紹前稱先鋒隊嘅懲教緊急應變隊，仲登咗張李詠儀同隊友訓練時嘅照片，相中靚女眼神凌厲堅定，都幾有震懾威力。
李詠儀係游泳同三項鐵人運動健將，曾參加本地多項渡海泳同三項鐵人賽事。佢話唔怕艱辛投考應變隊，係因為工作更具挑戰性，仲因為身形高大，獲編配向來係男性天下嘅槍手（Gunman）崗位添！不過，佢唔係唯一嘅女槍手，事關現有一百三十名隊員中，共有十六名女槍手。佢話：「晴天時一齊曬，落雨時一齊淋，無任何優待。」
李詠儀（左一）因為身形高大，獲編配做槍手。