SUN搞作：官場現形記：優化性的不足

古語有云：「有早知，無bb」，但係香港地今時今日嘅人口老化，卻源自無長遠政策，搞到「無早知，無bb」。一班議員就為咗整多啲bb，女嘅費盡唇舌，男嘅耗盡精力，都好似出唔到啲咩概念種子。當中「會計數界議員」與「工會中女議員」就非常投入，互相切磋造人心得。

會計數界：計嚟計去，計唔準日期，先係香港無bb嘅原因！我促請政府增加多啲會計數師嘅就業機會，幫想生育嘅男女計準啲，自然一擊即中！

工會中女：荒謬！你自己又話好多好多嘢做，先至唔得閒同老婆造人嘅？你呃人！

會計數界：咁都想搵多啲o架！係人都想個bb一出世就出老千，贏在起跑線上！

工會中女：咁咪應該要平等啲，搞標準工時囉！好多女仔為個衰佬日做夜做，但就係結唔到婚！

會計數界：要減人工咁搞標準工時，做少收少，無錯返屋企有時間做，但係咪又係得個做字，養唔起呀！

工會中女：唔負責任嘅男人！父權社會要女人為公為私都做到死，男人一句就話養唔起！

會計數界：吓！唔通你……

工會中女：係呀！我係有咗你嘅骨肉！你仲講咩同你老婆無得做？賤男！

會計數界：（唏噓遠望）我諗，落實到一個比較好嘅人口醫療同教育政策之前，你都係唔好生佢出嚟……

工會中女：我就知你呢啲男人會咁！淋淨，你教我點樣生佢出嚟！

淋淨bb：其實……其實我未經人事，唔知點教你生bb……