Sun奇古怪：Sun潮語：【鳩做】

真普選聯成立，由所有泛民政黨及其他團體組成，希望能夠團結各方勢力，爭取香港嘅真正民主。姑勿論結果如何，最後會唔會有人反枱，或者有人又鬼鬼祟祟偷番薯，走去西環暗通阿爺，呢啲都屬未知之數。不過，真普聯成立，對於即將佔領中環嘅支持者，的確帶來未出發先興奮嘅感覺。不過話雖如此，最近激進民主派內部，又喺網上爆出對於佔領中環嘅激烈爭論。有人批評所謂佔領中環行動，只係一啲老人知識分子及老中產，企圖令香港多年嘅民主運動，有一個完美謝幕。係夕陽階級希望走入黑暗遲暮之前，去佔領最後一道光環。呢班人反對佔領中環，批評打算參加嘅人係「鳩做」，仲揚言要向一啲同樣係激進派人士及機構宣戰。而被批評嘅另一方亦不甘示弱，拍短片還擊指摘對方根本拿不出比佔領中環更好嘅方案。兩方嘅支持者因為「鳩做」問題，繼而喺網上互相開火。之但係，到底乜嘢先係「鳩做」？

潮語「鳩做」同之前本欄提過嘅「9UP」、「鳩瀏」都係屬於「鳩系」潮語。鳩本身係雀鳥嘅一種，同一個粵語粗口字同音。「鳩做」其實有幾個意思，第一個意思係指求求其其胡亂做完一件事就算，不求結果但求做咗，完全為做而做。另一個意思就係不理後果，盲目咁去做一件事，通常做嘅嘢都係帶點戇居嘅成分，又或者係人哋眼裏睇嚟絕對唔會成功嘅嘢，但係你就走去「鳩做」。同時，「鳩做」嘅另一意思就係戇居又傻仔地做一件事。

記得電影《那些年，我們追過的女孩》中，女主角有一句對白：「人生，有很多事情都是徒勞無功的……」其實，只要自己開心「鳩做」又有乜所謂？與其話人「鳩做」，不如諗吓自己對呢個社會又可以做到啲乜嘢仲好啦。