政壇：搞搞政：石永泰為講真話唔入黨

大狀從政，近年有唔少人辦，但新任大律師公會主席石永泰就話唔會加入政黨或組黨，因為佢想保持真心真意喎。佢話如果大律師從政，好多時言論都會受黨派立場影響，唔能夠講出真正諗嘅嘢。而且好多時都見到大律師從政之後，講嘢過咗火位。用呢句說話嚟睇香港政壇，真係令人唏噓。

石永泰尋日出席一個電台節目時，畀主持人問到佢將來會唔會踏上政途，佢斬釘截鐵「say no」，話組黨或做官都唔係佢杯茶，只會一心為公會做事，做完主席就告一段落，亦冇諗過做律政司司長，雖然佢覺得司長呢份工好有趣，但要平衡法律以外嘅考慮，就未必符合佢性格喇。

對於有人將中港矛盾解說成兩地文化差異，港人應予以包容，石永泰點睇呢﹖佢就強調文化同文明係兩回事，仲舉例話：「你夠唔夠膽喺文化交流大會上講，我哋嘅文化係隨地吐痰，踎喺街邊唔排隊？」佢跟住強調，依家內地人已經文明咗，希望港人慢慢接受佢哋轉變。