政壇：狄志遠拒認係梁粉

新一屆政府上任後，唔少梁粉都先後出任重量級公職，近日被視為梁粉嘅前白鴿黨副主席狄志遠（Dick）都有好消息，繼被政府委任多項重要公職後，喺基督教香港信義會社會服務部任職副總幹事嘅佢，嚟緊又會「坐正」升任總幹事。咁算唔算又一個梁粉上位？當事人阿Dick澄清佢同特首梁振英其實唔係好熟，反而同梁嘅競選對手唐英年熟啲，因為當年佢同唐唐一齊喺立法會工作時座位相鄰，做得鄰居，梗係話題多啲喇！

太太避嫌辭職

國教事件時阿Dick表態支持，係泛民陣營中較支持梁振英政策嘅其中一個，自此就被標籤為梁粉，呢個形象對佢出任公職、甚至喺教會同教育界嘅發展都有不可輕視嘅作用。但佢尋日就主動割席，話其實佢同CY根本唔多熟，反而同唐唐到依家都偶有聯絡。阿Dick強調，自己一直憑良心做事，人哋點講佢唔會放上心喎。

講番今次升職，阿Dick話升職後工作壓力大咗，但對佢嘅財政並冇着數，因為佢太太本來亦喺信義會任職老人工作嘅服務總監，過去兩人共事未必有利益衝突，但今次佢升正，為免畀人質疑佢處事偏袒，太太決定完成交接工作後就離職，所以對佢哋一家嚟講，家庭收入將會不增反減。

阿Dick強調，佢同太太一直係信義會教友，佢喺一年前放棄手頭嘅幼兒同家長教育工作加入教會嘅社會服務部，主要都係想服務教會同啲有需要嘅人，所以唔會計較金錢。至於太太之後會搵番工定係轉做全職家庭主婦，就暫時未有決定。