潮爆壽衣贈夫 婆婆奪設計獎

【本報訊】「辛苦都冇得放棄，因佢係自己身邊嘅人。」七十九歲的陳廣興十多年來百病纏身，但七十歲的妻子一直不離不棄，堅定地說:「就算好攰，都會死頂！」陳伯為感謝妻子多年來的照顧，特別以妻子最喜愛的鮮艷色彩，設計了一件繡滿花朵的背心外套，更深情地說：「我係窮鬼一名，冇送過禮物同花畀太太，呢件就當係送畀佢，用嚟多謝佢嘅禮物。」

痙攣女「玉黍仙子」頌母恩

需靠輪椅代步的陳廣興，○四年曾爆血管又有心臟問題，一年內進行兩次大手術，元氣大傷。陳太指，丈夫後來又患上肺氣腫，卻因醫生斷錯症，健康急轉直下，「佢嗰時真係好辛苦，食唔到、又瞓唔到，我嘅心情都跌到落谷底，眼淚係自動流出嚟。」回想日撲夜撲到醫院探病的日子，陳太直言：「真的很累」，但她堅定地說，逾五十載的夫妻，陳伯是「身邊嘅人」，無論如何辛苦，從沒想過放棄。

陳伯深深感受妻子的關愛，令從未設計過衣服的陳伯，決定參加香港理工大學轄下綾緻康健服裝中心舉辦的「展才設計」活動，為妻子設計出窩心的背心外套作答謝，昨日雙雙出席活動的頒獎禮。

七十七歲的何女有感世人均難逃生老病死，設計了西裝壽衣給九十五歲丈夫。她指丈夫愛看報，衣領和袖口仿報紙設計，丈夫又曾當地盤工，故加入棚架、鋼筋的設計，又繡上丈夫喜愛的花朵，她更奪得最佳設計意念獎。患有痙攣的高詩韻則因母親愛吃粟米，設計出「玉黍仙子」，則獲最富創意及最佳設計獎。