SUN搞作：Sun官場現形記：高官有「蝨」身份

唔怕「木嘴」，只怕木蝨！日前喺一個基層座談會上，有住板間房嘅男士向「淋淨」送上一樽蝨，但見有人花容失色，「木口」木面，反觀張見樽就不失霸氣，一見到個樽即時搶接。返到門常開，原來有段未曝光的真心對話。

淋淨：咦……唔制呀！咁污糟！

見樽：嚟啦！咁大個女怕咩啫？

淋淨：好衰o架！

見樽：你堂堂司長「好打得」，冇理由畀隻蝨KO呀？

淋淨：我叫「好打得」，唔係叫「好打蝨」……

見樽：好喇，你瞇埋眼，輕輕摸吓！

淋淨：嘩！

見樽：哈哈，考吓你，知唔知木蝨通常喺邊度生存呀？

淋淨：樽囉？

見樽：冇錯，依家喺樽度！

淋淨：好多樽都有啦，例如紅酒樽啦……

見樽：個啲叫「木塞」，唔係木蝨呀！

淋淨：好多高官都係嬌生慣養啦，我點知喎！嘩！

見樽：你又尖叫乜嘢呀？

淋淨：原來你個樽都未開，呢隻係……

見樽：哈哈，一早話「樽」有蝨啦！扶貧落得區多，瞓埋板間房就有，呢啲叫有「蝨」身份！

此時，見樽長篇大論，但見淋淨冇乜反應，原來已經嚇暈咗。

作者：李衞