SUN搞作：黑痲訛先生

黑臉琵鷺數量減少，又「移民」離港，有云如果后海灣未來有發展壓力，黑臉琵鷺又會飛走。雖然環境差，無嘢食都係原因之一，但曾雀屎條友成日恃住特權走入去影相，唔多唔少都有影響。唔好以為呢個係誇張嘅講法，大家試吓細心諗吓，如果有條友，日日喺你住嘅地方，無端端喺度左影右影，咁樣畀人騷擾法，係人都會覺得煩喇，何況黑臉琵鷺見到嘅並唔係同類！再者，曾雀屎淨係知點樣貪威識食，額頭上鑿咗「自私」兩個字，佢連香港七百萬市民嘅福祉都置之不理，更何況係鳥類？而且漁護署同警方都話對呢件事毫不知情，條友喺影雀嗰陣做咗啲咩，真係鬼知咩？老實講，如果黑臉琵鷺會怒啄人嘅話，相信被啄嘅一定會係曾雀屎喇！