Sun奇古怪：Sun潮語：【呃LIKE】

香港唔知幾時開始變成行騙之城，成日都話呢個講大話，嗰個又話邊個邊個呃人。記得港台節目《警訊》，有個叫騙案嘅環節，專門講啲騙徒嘅行騙手法。依家呢個環節肯定大把個案可以拍，仲可以一星期做足五晚，日日提醒香港人唔好畀人呃，尤其係要小心被騙徒、歹徒、政黨、政棍、報章、電視、專家、高官……等人欺騙，收視肯定高過亞視啲節目。不過，唔知廣播處鄧處長會唔會又要將呢個節目長期放喺亞視播出呢？其實依家啲節目放喺邊度播都無乜所謂，反正只要個節目係正，就會被人喺網上面瘋狂share，唔使呃都大把人畀「LIKE」!

潮語「呃LIKE」係一個社交網絡網站Facebook嘅專屬語言，因為Facebook有個叫「like」嘅功能，當你post咗一啲近況或相片，你嘅朋友睇到後可以按「like」讚好。呃者，騙也。「呃LIKE」嘅意思係特意算過度過計過諗過之後，去post一啲文字或照片上網，去博得最多人嘅「like」。所以嚴格嚟講「呃LIKE」唔算係呃，除非你post出嚟嘅嘢係捏造又或者你所講嘅嘢係大話，否則「呃LIKE」只係一種提升自己受歡迎程度嘅手段而已。不過，真係唔排除有啲人係會為「呃LIKE」而造假，喺網上世界嘅嘢有幾成真幾多成假？真係愛因斯坦翻生都答你唔到。

「呃LIKE」嘅手法有好多（記住係「呃LIKE」嗰班人，並唔係真心post嘅朋友），例如有人會post同名人嘅合照、失戀者會寫啲無病呻吟嘢等。你可能會問：呢個世界邊有咁無聊嘅人咁得閒去「呃LIKE」？「LIKE」又唔可以當飯食？對！你問得好，呢個世界真係有咁無聊人，啲「LIKE」係緊要過食飯！點解會咁？可能Facebook創辦人朱克伯格都唔知……呢啲可能係「網路精神病」。