政壇：政商定格：李小加約傾偈呵番阿王

港交所「夜期」即將喺下月八號開波，行政總裁李小加頻頻同小經紀會面。繼下月十七日將會同八大經紀組織「世紀飯局」外，原來下周一李小加就約咗立法會議員「阿王」王國興、證券及期貨專業總會會長王國安、同證券及期貨從業員工會會長林德明喺港交所見面。

心水清嘅朋友應該知道，阿王喺立會上對「夜期」最咬住唔放，多次咬牙切齒，嘈「夜期」不利金融安全，強烈提出反對。但如今「夜期」已「米已成炊」，改變唔到現實。李小加就約咗阿王下個禮拜一見面，阿王並帶同兩大前線經紀組織，一同見小加。

雖然話今次會面係介紹港交所策略發展大計，但明眼人都估到，既然港交所喺夜期已「贏咗」，可能係想「呵番」佢哋，等佢哋順番條氣。