政壇：他信訪港超豪房車代步

上月底泰國總理英祿帶囝囝訪港，仲話唔會同流亡海外嘅哥哥、即泰國前總理他信見面。但有本報忠實讀者報料話，尋日下晝約三時，他信同男性友人由尖沙咀「富豪飯堂」行出嚟，他信笑容滿面，登上灰色豪華房車離去。

讀者見到嘅疑似他信，代步嘅靚車係以製造頂級豪華房車聞名嘅德國Maybach，價值高達八百二十多萬元。舊年五月，記者曾撞見他信偕友人喺尖沙咀歎下午茶，當時用以代步嘅只係豪華七人車。

翻查有關豪華房車嘅資料，車主登記係「Crown Horizon Limited」，公司董事係何平仙（Ho, Robert Ping-Hsien），同泰國卜蜂集團（內地稱「正大集團」）海外財務長何平仙同名同姓。卜蜂係泰國最大嘅商業集團，由華人謝易初兄弟創辦，集團最近最轟動嘅投資係豪擲七百二十七億港元，接手滙豐控股持有嘅平安保險股權。