政壇：議員嗡人策鬥騎呢

政務司司長林鄭月娥尋日去立法會特別內務委員會交代政府喺扶貧同人口政策嘅工作進度，唔知呢兩個議題係咪已講咗好多次，議員問嚟問去都係了無新意，一時要求政府輸入外勞解決部分行業人手不足嘅問題，一時就要求當局檢討單程證配額制度，而會計界梁繼昌同工聯會麥美娟都算出位囉！

梁繼昌話本港出生率不足主要有兩個原因，第一係因為啲家長唔想為仔女嘅教育同房屋問題而煩惱，細細個就要幫小朋友撲學位，大個咗之後又要煩買樓，問當局除增加子女免稅額外，會唔會考慮向初生嬰兒提供現金津貼。跟住佢就話，唔少會計界選民向佢反映，話喺香港工作壓力太大，好多已婚夫妻根本冇時間享受性生活，問政府有冇改善方法喎。

林鄭當堂發笑

緊隨其後嘅麥美娟就要求政府喺《僱傭條例》中盡量保障婦女權益，包括增加產假同改善待遇，盡量釋放婦女勞動力。佢又引述梁繼昌所講嘅生育問題，話標準工時可以減低僱員工作壓力，增加夫妻嘅生育意欲。不過，講多兩句後，佢突然無厘頭咁講咗一句：「標準工時對未婚女性仲緊要，婚都結唔到，講咩要生育呢個問題呢？」佢講到時下女性因冇標準工時而結唔成婚。咦！佢係咪講緊自己？

聽到佢哋咁講，林鄭當堂笑咗出嚟，話生育係個人選擇，佢都唔知點樣先可以令啲夫妻生多啲小朋友。佢又透露，唔少朋友同佢講組織家庭有好多負擔，所以寧願揀養寵物，都唔肯生番個小朋友，又話中央政策組會研究其他國家嘅經驗，睇吓可以點樣吸引更多人生仔喎。