SUN搞作：打橫嚟講：香港新版《危樓「春」曉》

全世界都不許發生的事，除中國大陸外，還有香港特區內可以見到，哼！就係：「政府公然賣危樓」。

喂！大佬！全香港人都知道天水圍天頌苑嗰兩棟短樁樓，大沉降大傾斜o架啦！如果無危險無問題，亦唔使「封艇」成十幾年，丟空變「凶宅」啦！

香港廢柴政府的房屋委員會不顧草菅人命的「逼人買居屋貨尾」，推售短樁危樓。有驗樓師隨傳媒親臨「驗樓」，不消兩分鐘，就被房署人員以佢並非「傳媒的一員」而請離現場。喂！行得正，企得正，層樓無景轟的，怕乜畀人知曉？仲有，呢兩棟短樁樓問題多多，並關乎人命的，理應要公開的讓專業人員睇清楚，而非將「臭屎」密冚，一切危機險象當不存在，咁仲係有承擔嘅政府所為嗎？

驗樓師短短分零鐘內已測出多處大瑕疵，而且乃是一手樓不應出現的問題，房署的垃圾九官仍敢答話係「我們正正跟足條例（去做）」，但佢哋只不過將牆身髹番一浸油遮遮醜，就當新樓出售；那十四年無用過嘅水管，幾多細菌？電器幾殘舊？都死得人o架！仲未計成棟樓被量到大幅度的「傾側」呀！唉！呢個打壞的政府，為咗呃人話「增加居屋出售」而不理市民生死！情何以堪呢？

一班九官為執行上頭交落的任務，無血性地做傀儡，有乜死人冧樓，係下屆嘅人的事；今日，總畀我過咗骨先，呢啲，就係鄧忍光式的公務員心態。各位市民聽我講，千祈唔好買，攞命仔較飛呀！反正都唔便宜啫！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府