SUN搞作：Sun官場現形記：家臣大戰副局始末

新官上任無晒火，講緊嘅梗係插隊副局「陸陰肌」，佢前日喺議會內盡顯其重複播放功能嘅持久續航力，但係看官切勿誤會，並唔係講嗰位蒙主寵召，即係上帝叫佢去讀神學嗰位，而係落選後「被慶祝」嗰位。「陸陰肌」此舉唔單止畀泛民圍插，連唐家重臣都睇唔過眼，寸佢話愛國愛港就係特首必然條件嘅，大有「成日講嚟托咩」嘅意味。李衞收到風，兩人啲牙齒印，原來係因為玩手機……

陸陰肌：（休會玩手機）信就信，唔信就唔信，乜鬼嘢「微信」？

唐家臣：劉華就劉華，江華就江華，乜鬼嘢劉江……

陸陰肌：咩話？你講邊個？

唐家臣：我講緊開會玩電子產品嘅閒人。

陸陰肌：玩電子產品，係高官嘅職責！做奴才嘅唔會知主子做幾多嘢！

唐家臣：你大我呀？我大大話話都有一千幾百票選我入嚟吹水，多過我主子，你呢？

陸陰肌：講票，我有廿萬票！

唐家臣：你有誠信問題！你係十九票王，得十九萬票咋！

陸陰肌：呢個只係僭建票數問題，不涉誠信！

唐家臣：真係香港要贏，你就要……

陸陰肌：（復會鐘響）嗱！我又要去玩電子產品喇！

唐家臣：乜你仲未玩夠「微信」咩？

陸陰肌：話你唔識嘢就唔識嘢啦，家陣入去開機播帶呀！

唐家臣：＊＠＃！＠＆＃︿！