政壇：政商定格：葉恭正賽車贊助捐仁濟

日前喺尖沙咀某酒店餐廳見到仁濟醫院總理Paul葉恭正夫婦同候任主席梁昌明傾偈，原來阿Paul旗下KCMG賽車公司獲邀六月下旬去法國，參加被視為賽車界三大盛事之一嘅世界耐力錦標賽，賽事已有九十年歷史，今次係首次有中國車隊獲邀出戰，難怪曾係賽車手嘅佢好雀躍，話會趁機將部分贊助所得捐畀仁濟。

阿Paul嘅太太Annika林麗珍都係賽車發燒友，當年就係喺澳門賽場上被老公英姿吸引，造就咗呢段姻緣。Annika好興奮話，到時一定要帶埋一對寶貝女兒齊去開眼界。擁有多架跑車嘅梁昌明自爆經常到珠海同肇慶鍊車，今次阿Paul咁勁獲邀出賽，到時要同仁濟兄弟姐妹組團去法國觀賽兼打氣至得。