政壇：搞搞政：立會剪布靠晒曾鈺成

立法會將於四月底審議預算案嘅《撥款條例草案》，社民連「長毛」梁國雄早就揚言拉布拉到尾，政府近期都密謀對策，但諗嚟諗去都發覺冇晒計，惟有旨意立會主席曾鈺成。因為只要有議員提出一項修訂，其他議員都可以無限發言，如果有三百項修訂，曾鈺成分分鐘要剪布三百次。

仲記得舊年底長津一役，只係剪咗一次布，點解今次要剪幾百次呢？因為舊年有勞工及福利局局長張建宗配合，向立會提交新文件，改為只申請增加人手編制，變相令長毛提出嘅四百幾項修訂自動報廢。但今次預算案撥款，唔可以沿用舊劇本喇。

政府官場諗過度過，只能寄望曾鈺成以「修訂類似」作原因，將三百多項修訂合併辯論，到時只需要剪一次布，然後再逐項修訂投票，雖然都要花唔少時間，但起碼唔使剪足三百次。之不過，點剪，一切都要取決於曾鈺成點決定。