政壇：黃靜文情歸廠商會

卸任九個月嘅政制及內地事務局前副局長黃靜文終於決定出山，但唔係重返官場，而係去廠商會接替梁世華，出任廠商會行政總裁一職。

黃靜文加入廠商會嘅傳聞已流傳咗好幾個月，我哋尋日打聽到佢呢一兩日會動筆同廠商會簽約，即時致電廠商會會長施榮懷，佢話雙方傾咗好耐，大家都經過幾個月時間互相了解，最終先達成合作共識。

能夠搵到前副局長替廠商會効力，施榮懷講起都開心，佢話好重視行政總裁呢個位，因為每名會長都係三年任期，但行政總裁就係長期作戰，而且要應付大量工作，小至廠商會中學，大至內地搞工展會都要幫手，加上明年係廠商會八十周年，一定好大挑戰。咁今次廠商會係咪重金禮聘呢？佢只係話以黃靜文嘅資歷同經驗，廠商會嘅出手非常合理喎！