政壇：魔僧返港指揮攪局？

中央政策組前首席顧問「魔僧」顧汝德，係香港最後兩任港督身邊嘅大紅人兼智囊，一直都有傳聞話佢係特務，自回歸後退隱江湖不理政事，就算兩年前出書，魔僧都無乜現身點評時事，但佢沉寂咗一排，近日又突然蒲頭，而且高調現身，佢大模廝樣返港，睇嚟都係為香港添煩添亂。

外國勢力插手干預本港政制事務，已經係政圈嘅公開秘密。今次魔僧突然返港，表面上係應港大邀請做學術研究，但呃唔到心水清嘅香港市民。佢今次現身，對時事指指點點，又表明支持所謂「佔領中環」，話佢唔係攪局都無人信喇。

港英時代，顧汝德已係末代港督彭定康嘅重臣，而肥彭派人嚟香港搞搞震已唔係第一次，今次佢返港咁活躍，既接受媒體訪問，又高調點評「佔領中環」行動，似乎佢已唔再扮演外國勢力嘅「地底指揮」，而升呢做咗「地面指揮」。如果真係畀佢攪局成功，爆發佔領中環，到時唔止中環有難，係香港有難至啱呀。