政壇：真普選聯盟面和心不和

醞釀咗幾個月嘅真普選聯盟尋日正式成立，首階段成員包括二十七位泛民立法會議員，當中包括同白鴿黨不咬弦嘅人民力量，但睇番雙方尋日喺記者會上嘅態度，就知道大家仲係面和心不和，搞到連公文袋嘅梁家傑都要幫手勸架，話泛民只有合作嘅條件，再無分裂嘅本錢，希望聯盟可以做到和而不同。

喺記者會上，全程面黑黑嘅白鴿黨主席劉慧卿，不單止同人力兩位代表全程天各一方毫無交流，仲交畀副主席「狗哥」蔡耀昌發言，而記者會未開完，卿姐就以趕時間開會為由急急腳走人。被問到白鴿黨可唔可以同激進派合作時，狗哥話要視乎大家係咪真心想討論，如果有人針對該黨惡意攻擊，或者動輒謾罵其他政黨，白鴿黨絕對唔會容忍。咁早就起晒弶，好明顯就係寸人力。人力主席劉嘉鴻就好大方咁話，雖然人力過往同泛民有少少爭拗，但都希望大家向前看，透過聯盟呢個平台爭取普選。

雖然幾乎在座所有成員都覺得尋日係一個好開始，但喺狗哥講緊嘢時，後面寫住「真普選聯盟成立宣言」嘅橫額突然間跌咗落嚟，泛民議員整極都唔可以將佢回復原狀，要改貼另一塊細啲嘅橫額，唔知咁又預示咗啲乜嘢呢？