SUN搞作：Sun官場現形記：周一鑊污糟過新沙士

新沙士殺到，香港人心惶惶。當年沙士之疫，漠視前線醫護壓力，搞到人才係咁流失嘅周一鑊，今時今日仲可以翻閹做平機會主席，真係叫人情何以堪？水鬼升城隍，周一鑊仲不知廉恥咁走出嚟，一班醫護自然睇唔過眼，挺身出嚟鬧爆呢條廢渣……

醫護︰你條友有咩資格做平機會主席？

周一鑊︰我識hea住做嘢，仲唔啱做退休俱樂部主席？

醫護︰有無搞錯，咁都得？

周一鑊︰無搞錯，我可以話你聽，招聘過程係好公正！

醫護︰有幾公正呀？

周一鑊︰公正過林公子攞最受歡迎男歌手！

醫護︰人哋係親生仔，點同呢？

周一鑊︰我都係主人身邊嘅寵兒—大太監喇！我唱《忘不了你》，仲正過林公子！

醫護︰嘩！咁都講得出口，正閹人！

周一鑊︰錯，我唔係閹人，而係一位翻閹之人就真！

醫護︰面皮厚到呢！難怪死都唔肯拆僭建。

周一鑊︰你咪亂講，呢啲只係程序問題所致，完全唔關我事，我依家已經搭咗棚，不過唔知幾時開工咁解。

醫護︰唉……有你喺度真係世界嘅不幸。

周一鑊︰又關世界事？

醫護︰你識鬼平權啲嘢咩，香港咁多少數族裔，你嘅問題可以話係世界性喇。

周一鑊︰我………

醫護︰算喇，唔想再同你講，呢度污糟到唔想留喺度。

周一鑊︰唔係啩，唔通呢度有新沙士？

醫護︰你咪仲污糟過啲細菌囉！

周一鑊︰@@#$$%%^&^&***