政壇：政商定格：李耀輝籲教國學化戾氣

圓玄學院前晚舉行慈善晚會，同屬道教嘅嗇色園黃大仙祠監院李耀輝都有到場，講起近日接連嘅弒親案件時感慨話，香港地少人多，容易積聚戾氣，加上社會充斥功利主義，傳統六親觀念淡薄，令年輕人唔知天高地厚。佢認為化解戾氣嘅藥方係喺學校全面加強國學教育，灌輸孝悌忠信等道德觀念，培育下一代珍惜生命嘅慈悲心。咁啱最近佢應某大學邀請，到學校開辦中國文化同道德課程，為期十四星期，希望藉此傳遞正面思想畀時下年輕人，引人為善。