政壇：搞搞政：「無殼」區議員天橋底都殺

元朗區議會尋日召開城鄉規劃及發展委員會會議，其中天水圍天盛選區議員陳思靜提出開闢行人天橋底作議員臨時辦事處，皆因佢過去一年多都係「朝行晚拆」，只靠擺流動街站會見居民。換言之，即係做「無殼」議員啦！直至今年因資源多咗，先可以由天水圍跨區到元朗開辦事處，一星期返天水圍五日見街坊。

據了解，與會議員一面倒支持方案，政府多個部門亦疑似開綠燈，規劃署話可以考慮，而地政處指待有關政策局支持就會做，但水、電同通訊等就要陳思靜自己搞掂；而民政事務處就話可以協調。陳思靜回應查詢話，首選當然係喺自己選區內設辦事處啦，但搵唔到舖位嘅話，「瞓天橋底好過瞓街」，所以就提出天橋底設辦事處係咪可行。其實立法會議員陳婉嫻早前都聯同建築學者、文化界人士組成「天橋底行動」。今次政府部門所講嘅「協調」同「考慮」，唔知係咪受嫻姐影響呢？