政壇：橄欖適時賣舖袋8500萬元

向來投資有道嘅立法會議員「橄欖」陳鑑林，鮮會損手爛腳。好似尋日就有報道指佢趁政府上月推出「加碼雙辣招」前，趕及放售大圍舖位套現八千五百萬元，更幫買家慳番三百幾萬元額外印花稅，難怪惹來「偷步放舖」嘅嫌疑。不過佢否認收風放舖，強調係買家主動搵上門，唔關佢事喎！

被指偷步放售嘅大圍舖位，係橄欖喺二十八年前同兄弟聯名以一百五十五萬元購入，今次賣舖淨係帳面已勁升近五十四倍，隨時「升呢」做億萬富翁，真係好搵過做議員。佢解釋，一直無意賣舖，係近兩、三年不斷有地產經紀游說佢賣舖，開價更由當初嘅四千五百萬元勁升至八千五百萬元，差成四千萬元，佢見心動不如行動，決定賣舖，留番啲閒錢投資股票好過喇。

咁啱行過嘅黨友蔣麗芸，聽見橄欖今次勁賺離場亦不禁高呼「Oh my goodness!」大讚橄欖好眼光之餘，更乘機叫佢請班黨友食飯添！