政壇：莊偉茵訪核電廠冇有怕

唔經唔覺，Quince莊偉茵出任中華電力企業總裁半年，之前忙於為中電加價四出奔波，仲坦言全無蜜月期。幸而佢將勤補拙，已對電力略有認識，佢仲話依家先知原來電都有靚唔靚之分。

大家冇睇錯，係「靚電」唔係「靜電」，Quince解釋，即係利用儀器同技術，將電力嘅質素提升，發揮出最佳嘅電能效應。好似扶手電梯有時會窒吓窒吓，就係因為啲電唔夠靚，咁就要加裝裝置提升品質喇。

為進一步了解電力，佢日前仲跟同事深入大亞灣核電廠參觀發電過程。怕唔怕有輻射？佢就話核電廠嘅核芯堆外層有三層加固保護，確保操作安全，佢睇見都好放心。佢話初初都驚加入中電會悶，但佢笑稱自己擅於在沉悶中發掘樂趣，依家同工程師齊齊開會「腦震盪」，擦出不少新火花。