政壇：蘇錦樑擺政助上枱闢謠

話說有傳商務及經濟發展局局長蘇錦樑之所以遲遲都未搵到副局長，係驚個副局長叻過佢，怕被人取而代之。咁啱佢個政治助理陳百里尋日首日返工，佢就趁機帶陳百里落立法會闢謠，證明自己唔係忌才，又唔肯評論自己係咪眼角高，但就唔肯交代揀唔啱副局長嘅原因。

佢喺介紹陳百里時話自己一向用人唯才，而佢亦一直積極搵副局長，皆因佢個政策局要兼顧嘅範圍較多，加上佢周不時要外訪，冇個副局長喺立會幫手代答問題真係冇咁方便。但佢話鋒一轉，話搵副局長始終急唔嚟，又自誇其政策局素來關係融洽、工作環境良好，希望新同事可以盡快適應喎！

陳百里就話首日返工未有時間向其他同事了解新崗位運作，被問到返新工有冇壓力，佢就話任何工作都有壓力，佢會盡快做到最好喎。

對於因做政助而辭去觀塘坪石區議員議席，佢話補選係必要程序，如果對街坊引起不便，佢只能夠講句唔好意思，但就承諾會喺依家嘅崗位做好啲，繼續服務市民。