政壇：新人肉錄音機劉江華捱插

喺兩會期間，中央多次就政改表態，話愛國愛港要係下屆特首嘅必要條件。立法會尋日討論下屆特首選舉候選人提名條件，署理政制及內地事務局局長劉江華首次披甲上陣，代去咗北京嘅局長譚志源回應議員質詢。白鴿黨劉慧卿問愛國愛港會唔會被列為候選人提名條件之一，點知劉江華全程錄音機上身，既唔肯正面回應，又不停將官方答案讀完又讀，令佢繼前政務司司長林瑞麟後成為新一代官場人肉錄音機。

大輝表失望

無論係工黨何秀蘭問特首選舉會唔會有篩選成分，定係何俊仁問政府遲遲冇意見係咪等中央發落，劉江華始終貫徹佢平淡如水嘅聲線，重申當局會按《基本法》及全國人大常委會嘅決定，制訂一七年特首選舉安排，又話當局唔會評論個別人士嘅意見。

除咗泛民狂攻之外，建制派嘅林大輝都插埋一份，對劉江華嘅表現感到非常失望，又寸佢故意迴避泛民嘅問題，話愛國愛港當然要係下屆特首候選人嘅必然條件。佢又話雖然劉江華係官場初哥，但都應該理直氣壯咁講出心底話，唔需要畫蛇添足。之不過劉江華仍然乜都唔理繼續播帶，話社會上有唔同聲音，特區政府會聽議員同市民意見。佢又話雖然自己係初哥，但知道已經答咗問題。

見到劉江華要以播帶逃避攻擊，佢嘅建仔黨友都幫吓手撳掣問問題，費事老朋友畀泛民攻擊到體無完膚。雖然劉江華講到含糊其辭，但基本法委員會副主任梁愛詩尋晚出席活動時，就主動提到鄧小平喺八十年代已經提出，治港嘅人一定要係愛國愛港嘅人，仲話雖然法律上唔會規定特首要愛國愛港，但佢認為愛國愛港嘅特首先可以管治好香港。