政壇：政商定格：周國豐創業報捷擬添食
早幾日下晝約三點鐘見到做律師嘅社交界名人Brandon周國豐同太太Jenny黃泳霖行入士丹利街一間茶餐廳，見佢哋同侍應好好傾，落咗柯打後坐低等食物期間，佢哋發現咗記者，Jenny話啱啱做完嘢，仲未食飯，所以特登約埋去幫襯茶餐廳。Brandon話最近忙緊兩間英國同法國床上用品代理生意，始終今次係佢首次做生意，好多細節要跟到足，所以比較忙啲。由於首次經商成績唔錯，所以佢打算做埋時裝代理，咁係咪佢至愛嘅英國牌子？佢賣關子話，暫時唔講得喎！講起佢拎住米字旗手挽袋通街走，佢笑笑口澄清，同最近有人揸住米字旗遊行，純屬巧合咋！
最近佢同太太、三歲大仔啱啱喺英、法返港，期間大仔玩得好開心，因為見到落雪，又有得搭船，但細仔冇同行，佢預告喺復活節將帶埋細仔到新加坡玩，當補番數喇！
周國豐（前）同太太黃泳霖（後）發現記者行蹤，友善打招呼。