政壇：政商定格：趙海珠唔撈法巴抖番吓

「合久必分」可以話係金融界嘅常態，「輪后」趙海珠喺法巴做咗六年幾，尋日剛辭任法巴上市衍生產品部聯席董事一職。自從年頭誕下龍仔後，佢本來今日應該放完產假返工，但佢尋日朝早就遞咗辭職信，引起行內一陣討論。

據悉佢尋日已正式離任。佢就話根據行規，遞信後可以即日唔使返公司，但就要有三個月過冷河嘅時間，而BB已有兩個月大，而且仲大得好快，已有十四磅重。咁辭職係咪想專心做全職媽咪？佢就解釋話唔係，純粹因為已經喺法巴做咗六年幾，加上小朋友又啱啱出世，所以都想休息一排，同埋轉吓新嘅工作環境。佢仲話嚟緊會透過獵頭公司等搵工，至於會唔會重返新聞主播界，佢話傳媒行業唔係佢嘅首選，最好都係做番金融業。

雖然法巴冇咗一位「生招牌」，但法巴上市衍生產品部董事郭小菱就話，珠珠放咗產假有一段時間，工作都係照樣咁做。